政Whats噏：法案委員會夭折　郭家麒濫開撈過界

政府向立法會提交嘅法案喺立法會大會首讀後，通常都會交由內務委員會討論是否要成立法案委員會審議。對於一啲具爭議嘅法案，議員都會要求成立法案委員會，但現時立法會即使唔係太具爭議嘅法案，都會有議員要求成立法案委員會審議，部分法案委員會開一次會就收工，近日仲有兩個法案委員會因參加人數不足，連會都開唔成，咁啱呢兩個委員會都係由泛民主派議員郭家麒成立。有建制派就鬧爆郭撈過界、搞亂檔，嘥晒大家時間咁話。

立法會秘書處今日(6日)發出文件，指《2018年〈2018年銀行業(修訂)條例〉(生效日期)(第二號)公告》及銀行業條例下嘅三項附屬法例小組委員會，因只有議員胡志偉同郭家麒加入委員會，未達最少三人組成嘅要求，所以成立唔到，原本喺今日上午舉行嘅會議亦要取消。無獨有偶，《2018年電訊(傳送者牌照)(修訂)規例》小組委員會亦因冇議員加入而未能成立，原定今日嘅會議同樣要取消。

金融界議員陳振英話，有關銀行業嘅嗰條條例草案並冇爭議，但郭早前喺內委會要求成立法案委員會審議，佢原本都加入咗法案委員會，但由於郭提出將會議日期由本周二(4日)改咗為今日，佢因為離港無法出席，所以就退出法案委員會。不過由於呢條條例草案係先訂立、後審議，所以就算冇成立法案委員會，都會喺刊憲指定日期自動生效嘅。

立法會資訊科技及廣播事務委員會主席葛珮帆(EQ)就話，委員會當中冇人反對有關傳送者牌照嘅條例草案，故並冇計劃成立法案委員會。但早前內委會開會時，由於資訊科技界議員莫乃光不在席，郭以為莫會希望成立法案委員會，所以就代其提出成立法案委員會嘅要求。對於郭經常要求成立法案委員會，EQ就批評郭「唔係嗰瓣又亂咁搞」，希望佢唔好成日撈過界嘥大家時間。

郭就回應稱，有關銀行業條例草案嘅法案委員會並非佢要求改期，而係政府未能於本周二派員到立法會開會，佢作為法案委員會最資深議員就宣布改期。對於其他議員認為有關法案並冇爭議，唔需要成立委員會審議，佢就話議員係有責任審議法案，睇清楚當中細節同有冇灰色地帶喎。雖然係咁，但如果佢動輒就要成立委員會，其他議員同秘書處真係疲於奔命，畀佢玩死喇！