政Whats噏：走火警唔帶三寶　田二少攬豬走佬

火燭咁危險，走得慢啲分分鐘冇命，所以定期舉行火警演習，預先熟習逃生路線都係需要嘅！立法會今日(7日)舉行定期火警演習，雖然消防公布只係用咗7分25秒就疏散完畢，成績睇落唔錯，不過其實得8個議員落咗嚟，其餘61人都唔知喺邊，且現身嗰8人完全唔着急，一臉輕鬆，個個都「施施然」咁行落嚟，完全唔似演習喎！

走火警唔單止要快，仲要夠輕便，無謂嘢就唔好拎咁多喇！消防處早已教市民走火警要帶逃生三寶：濕毛巾，鎖匙及手機。不過實政圓桌議員田北辰(田二少)就好似唔明呢個道理喇，冇啦啦拎埋個「豬仔紙牌」嚟演習，佢解釋係見到好多人關注漁護署本周二(4日)為非洲豬瘟疫情演習，所以佢今日火警演習都要帶埋隻豬仔，唔知一旦真係火燭嘅時候，田北辰係咪都打算拎埋隻豬仔呢？

至於新上任冇耐嘅議員陳凱欣喺今次演習完全冇影，唔知佢係已經熟悉立法會嘅逃生路線，定係搵唔到逃生路線，落唔切嚟呢？