政Whats噏:羅冠聰周庭赴美唱衰香港 周浩鼎打對台

2018年12月07日 22:00
東網電視
更多新聞短片
羅冠聰與周庭赴美繼續唱衰香港,周浩鼎打對台撥亂反正。(設計圖片)

民主派車輪轉到外國「唱衰香港」,早幾日輪到香港眾志羅冠聰、周庭去美國華盛頓,同當地國會議員、政府機關、智庫、非牟利機構等代表會面,叫佢哋關注香港人權狀況,甚至叫人哋加快審議《香港人權與民主法案》,完全係乞求外國干預香港內部事務。你有你唱衰,建制派立法會議員周浩鼎去開華盛頓開會,就趁機向當地議員及商界領袖「唱好香港」,撥亂反正,一於同民主派打對台。

羅冠聰、周庭今次赴美係因為早前香港眾志秘書長黃之鋒獲頒蘭托斯人權獎,原本佢應該親身領獎,但因為官司纏身,向法官申請離港被拒,本護照要繼續扣留喺高等法院,出唔到境就唯有將「唱衰香港」嘅重任交畀黨友,而羅、周二人就喺頒獎禮上發表演講,叫美國多啲干預香港人權狀況。

其實美國對香港嘅人權狀況並唔係特別上心,雖然美方在2年前提出《香港人權與民主法案》,但法案審議一直進展緩慢,事關美國國會轄下嘅委員會甚多,每個委員會都可能有幾百個法案,所以要按緩急輕重排列審議嘅先後次序,好明顯美國覺得有關法案冇迫切性加快審議。最好笑嘅係羅、周見到咁嘅情況仲死心不息,堅持去美國叫人推動有關法案,加強對香港嘅人權監察喎。

咁啱得咁蹺,周浩鼎跟咗立法會團去華盛頓出席反恐及反洗黑錢工作會議,難得有機會同美國國會議員及商界領袖交流,當然要反擊民主派「唱衰香港」嘅言論,以免佢哋「一把聲」講晒,搞到美國真係誤以為香港情況每況愈下就弊喇!周話,近年美國的確聽到唔少「香港唔掂」嘅消息,但一國兩制實行咁多年,呢啲負面消息唔會影響佢哋喺香港或中國內地嘅投資,對香港嘅制度依然有信心。

講就係咁講,睇怕班美國佬都係見人講人話,見鬼講鬼話,既然講到對香港咁有信心,美國國會美中經濟與安全審查委員會早前就唔會發表報告,建議國會命令商務部評估香港嘅獨立關稅區地位,無論是否成事,建議已觸動港府及香港商界嘅神經。不過,多個建制派議員去美國發聲,相信都係好事嚟嘅。