每日一片：太子驚現撞車黨　事敗之後勁囂張

撞車黨在香港愈來愈猖狂？網民Kin Pong Lai今日（9日）凌晨時分，在Fb群組「馬鞍山之友」上載影片，顯示一名穿上藍色風衣，掛着斜孭袋的男子，在太子長沙灣道疑以「撞車黨」手法搵食，過程被涉事車輛的車cam拍下。事敗之後，該男子不僅未有悔意，反而囂張稱：「過馬路唔得呀？」

影片所見，片段攝於昨晚7時許，拍片車輛正沿長沙灣道向美孚方向駛去，及至 與界限街相交的一個路口，一名男子突然自路邊跑出，並擺出「預備」姿勢，準備「撞車」。涉事司機見狀減速，男子主動撞上車頭冚，再滾到地上。鏡頭外，一名女子大聲尖叫：「嘩！嘩！」司機則立即爆粗。

司機事後落車，質問男子「你玩咩呀喺度？」男子回應：「過馬路唔得呀？」司機再問：「你玩咩呀？」男子再次回答：「過馬路唔得呀？」之後司機指：「過馬路？影住你啦！」影片未有顯示事件如何「收科」。

發文者附上了另一段影片，內容相信是涉事司機的錄音。他稱曾一度追趕該名疑似撞車黨，惟遭一名女子阻礙，「我推開條女，佢嗌非禮。」他續指，車身被撞凹，警員事後到場拍照及睇車cam片，「話追唔追究都要報交通，因為撞咗，如果追究就要去差館落口供。」

警方發言人表示，昨日晚上8時左右，接獲一名55歲謝姓男子報案，指一名年約20多至30多歲的本地男子，突然衝出馬路，兩人因碰撞而發生爭執，對方並無受傷，案件列求警調查，由深水埗警區人員跟進。