政Whats噏：見區議員無議辦　張建宗只係得感動？

唔係個個區議員都咁容易搵到合適嘅地點做辦事處㗎，政務司司長張建宗今日(9日)出席新民黨離島區議員傅曉琳(Sammi)辦事處嘅開幕禮時，張講起知道Sammi多年都開唔到辦事處，曾答應話如果有日辦事處開幕一定到，今次履行諾言。雖然張建宗呢番說話得到現場嘅掌聲，但不禁令人諗起，香港仲有幾位區議員未有辦事處，到底張建宗有冇做啲嘢去幫吓佢哋呢？

張建宗致詞時認叻，講起近日去咗大埔區區訪，完成問責官員兩年內走訪18區流程，形容自己係超標完成，早咗半年零兩星期達標，有好多時間可以提早展開第二輪。佢又講起，之前去離島區議會，知道Sammi冇辦事處，拉住易拉架、一張枱同一張櫈，去接觸市民，自己當時好感動咁話。

其實深水埗區議員袁海文等區議員都冇辦事處好耐，至今仍然係無殼蝸牛，而Sammi今次新開嘅辦事處，都要幾經辛苦才抽籤抽中。張建宗淨係講句好感動，其實到底有冇咩好方法幫吓呢班「流落街頭」、搵唔到地方開辦事處嘅區議員呢？