政Whats噏：嫻姐倡設育兒券　釋放婦女勞動力

香港人工作繁忙，唔少人都唔敢生仔，怕生咗又冇人湊。兩年前政府就推出試驗計劃，資助祖父母上堂學習幼兒照顧課程，希望釋放更多勞動力。不過，祖父母未必個個都肯全職湊小朋友。婦女事務委員會主席陳婉嫻(嫻姐)就批評，政府30年來嘅育兒政策都冇進步過，佢最近已向財政司司長陳茂波(波叔)要求，喺新一份預算案中為3至6歲小朋友設立3000蚊育兒券，以便家長請人湊仔，釋放50幾萬潛在嘅婦女勞動力。

嫻姐日前講起，佢個妹約50幾歲做嫲嫲，當時佢係護士長，個仔求佢幫手湊孫時，個妹就拒絕咗，頂多只肯喺星期日幫手湊吓，因為唔想咁辛苦，亦唔想放棄自己嘅工作。嫻姐話，妹妹嘅資歷深，又可以管理埋行政、管埋數，外面好多人請佢，佢當然唔想放棄自己嘅專業，走去全職湊孫啦！問題唔係錢，而係覺得全職日日湊孫，就好似孭住一樣嘢咁好辛苦。

嫻姐又話，唔少祖父母都有類似嘅諗法，覺得「嗱，我就已經湊大我嗰代啦，我仲要幫你湊呀？咁你都畀我歎吓啦」。有好多長者願意湊2、3日，但日日就未必得，始終年紀大，體力已大不如前。佢話，自己關注婦女權益已經幾十年，發覺30年嚟，政府嘅育兒政策冇進步過，根本無法釋放婦女勞動力。

佢話，其實好多媽媽通常都想自己湊剛出世嘅BB，等到小朋友2、3歲大，媽媽就會有啲想出嚟做嘢，當中唔少係專業人士。佢最近就向財爺提出建議，喺制訂新一份預算案時，為3至6歲小朋友設立3000蚊育兒券，以依家小朋友溫習書室及課餘活動，平均每月約4000多港元計算，家長只要多付出1000多港元，就可以將小朋友安排喺適當嘅中心，自己重投職場。嫻姐又建議，可以就託兒服務設立類似平安鐘嘅非牟利機構，令到育兒政策得以落實。