政Whats噏:范國威重返議會 新同盟換屆年輕化
新民主同盟今午(9日)召開會員大會,並選出新一屆執委會成員,大埔區議員任啟邦、周炫瑋、同埋西貢區議員呂文光將會出任輪任召集人。而喺今屆執委會被選為輪任召集人嘅立法會議員范國威,由於喺今年3月立法會補選中成功重返議會,所以根據黨章規定,唔可以出任輪任召集人,只保留執委會當然委員一職。
新一屆執委會成員將會喺明年1月1日上任,現任司庫繼續由北區區議員陳惠達連任,而執委方面,大埔區議員關永業、荃灣區議員譚凱邦將會連任。現任秘書長陸耀文、現屆輪任召集人兼西貢區議員鍾錦麟、西貢區議員黎銘澤同埋社區主任馮君安將會出任新一屆執委成員。至於秘書長一職,將會由大埔社區主任胡耀昌出任。
喺新一屆執委會中,唔少成員都係2010年創黨後先加入,包括胡耀昌、黎銘澤、周炫瑋、呂文光同埋馮君安,屬黨內生力軍。任啟邦就話新同盟依家逐步邁向年輕化,希望新一屆執委會可以帶來更多新思維,應付未來2年嘅選舉。