政Whats噏:政府重置展亮中心 議員炮轟閉門造車

2018年12月10日 13:40
東網電視
更多新聞短片
議員揚言繼續就重置展亮追殺政府,勞福局今次真係自製危機喇!(設計圖片)

政府喺《施政報告》中提出興建新公務員學院,新選址就係位於觀塘嘅展亮技能發展中心,仲話新嘅展亮中心會有「加強版」添!事隔2個月,新選址遲遲未有聲氣,近日有傳展亮中心將會喺九龍塘牛津道一間舊校舍重置,不過政府一路都冇回應傳言。有民主派議員爆料話,曾經去信勞工及福利局局長羅致光要求會面,但對方只係回覆一封信,但就避而不答有關展亮重置問題,唔通羅致光學人「閉門造車」?

據聞勞福局喺回覆該名民主派議員嘅信中,只係回應話會喺市區覓地重置,亦會同職業訓練局商討新嘅服務模式,同埋同受影響嘅家長、學員及員工溝通,字裏行間冇提會唔會同該議員會面。該名議員批評,政府咁嘅做法係黑箱作業,對受影響嘅人士唔尊重,2個月嚟都冇搵過受影響人士同埋議員溝通,做法好難令人接受。

身為立法會福利事務委員會主席嘅鄺俊宇就質疑,勞福局迴避問題、歎慢板,只會玩殘一班殘疾人士,釀成「局長危機」。佢認為,「醜婦終須見家翁」,政府應為殘疾人士諗多步,盡快開誠布公。社福界立法會議員邵家臻就批評當局係閉門造車,呢頭聲稱重置嘅展亮係「加強版」,但係另邊廂又唔肯公布更多詳情,覺得局方根本係重門深鎖。

雖然政府對重置展亮嘅選址唔肯漏口風,不過有民主派立法會議員就繼續追殺,今日(10日)建築署回應議員查詢時就話,勞福局建議喺九龍塘牛津道空置校舍進行改建工程,係配合一間綜合職業訓練中心嘅裝修工程,初步預算要近3000萬港元,預計2021年完成。雖然建築署都唔肯明講呢個綜合職業訓練中心就係展亮,但係外界都估計就係嘞!

政府迫遷展亮嘅理由之一係建築物太殘舊,係時候重建,邵家臻話,展亮現址建築物有50年歷史,但係牛津道嘅舊校舍有50幾年歷史,仲舊過觀塘展亮現址,再加上疑似新選址嘅地點比較吊腳,質疑有邊方面優化喎。

上述幾位議員都揚言會繼續追殺政府,同時會自行同持份者研究新中心嘅硬件同軟件。搞到咁大鑊,睇嚟勞福局今次真係自製危機喇!