政Whats噏:立會有廚神 柯仔半粒鐘煮3餸1湯

2018年12月10日 19:33
東網電視
更多新聞短片
原來柯創盛都係煮飯高手。

今屆立法會不論泛民定建制派都有唔少隱世廚藝高手。立法會議員柯創盛(柯仔)就由細煮飯煮到大,喺小學六年班已經煮飯畀成家人食,唔少家常菜都難唔倒佢。柯仔仲話,唔計準備食材嘅時間,最快可以喺半個鐘之內煮出三餸一湯,認真犀利。

雖然可以「光速」煮飯,不過柯仔就話做咗立法會議員之後,成日要喺金鐘同觀塘兩邊走,做完立法會事務就要落區做番區議員工作,所以已經有一段時間冇煮飯喇。佢煮飯嘅秘訣就係最緊要識煮,反而啲食材唔使一定要靚。咦,唔通係化腐朽為神奇?

煮開飯嘅柯仔笑言最鍾意行街市買餸,唔好以為佢去得多就好熟架步。佢話試過有啲街市阿姐見佢四眼仔,以為佢好易恰,其實佢除咗練成數口精之外,仲會落足眼力𥄫實,例如買海鮮時會睇吓有冇被人倒埋啲水,或者買菜時望實個磅,慎防被呃秤喎!既然立法會有咁多廚神,唔知幾時可以嚟個大比拚呢?