政Whats噏:白鴿又搞基建團 疑鬼祟縮細黨徽

2018年12月10日 23:03
東網電視
更多新聞短片
一張宣傳港珠澳大橋嘅海報上,有一個縮細版白鴿黨徽。(讀者提供)

唔少大型基建項目如港珠澳大橋喺今年內啟用,地區人士都紛紛趁機搞街坊團,不過呢啲項目喺議會上曾遭泛民主派反對,所以泛民搞呢類街坊旅行團都幾尷尬。最近又有民主黨(白鴿黨)地區人士搞相關活動,不過就被批評行徑鬼祟囉。

上月白鴿黨嘅沙田區議員吳錦雄搞旅行團,標榜一次去晒兩個基建,結果換來建制陣營批評「身體最誠實」。吳當時接受訪問時話,黨內有提醒過應低調處理,好似搵居民協會主辦。

不過,最近又有讀者發現,荃灣社區顧問黃湛聯宣傳中山珠海兩天遊嘅海報,旅行團會經港珠澳大橋去珠海,更形容大橋為「海上巨龍」、「世紀工程」等,而海報當眼位置就寫上福來邨居民聯會同荃灣康樂會。而最鬼祟就係,黃湛聯嘅相片隔籬,有一個極不顯眼嘅白鴿黨黨徽,唔通就係聽黨呼籲低調處理?