政Whats噏:籲勿到北角車禍現場 郭偉強網民爆罵戰

20181211
東網電視
更多新聞短片
北角尋日發生致命交通意外,郭偉強更因而與網民爆發鬧戰。
北角尋日(10日)發生致命交通意外,工聯會議員郭偉強特此親身去到東區醫院了解情況,仲喺Facebook呼籲市民唔好前往北角現場,以免更加混亂,不過就有網民批評佢嘅做法,話佢去到醫院都幫唔到手,只係搞住啲急救人員,認為現場消息睇新聞都足夠,點知郭劈頭嘅回覆就係:「呢個世界多你一個已很多餘。」引起雙方罵戰。
網民形容郭係「泛民本色」,即係「有事唔好搞我,無事去攞個彩」,暗指郭嘅做法係政治抽水,不過郭隨後反擊,嘲諷「要學反對派匿埋才是幫到手」、「難怪反對派永遠是對的!」
郭接受東網查詢時解釋其實過往做法都係咁,每次發生工業、交通等意外時,一係去案發現場,一係去醫院,雖然佢唔係醫生,但係可以關心吓啲死傷者家屬,同埋提點佢啲流程、點樣跟進等,佢又形容網民係「鍵盤戰士」,認為佢哋對社區冇感情,所以先講得出咁嘅說話。
至於去咗北角案發現場嘅民建聯議員張國鈞都難逃網民批評,Facebook畀網民「洗版」,寸佢「影相打卡係咪好開心?」「你醫生定救護員?到現場有咩幫助?」「多謝垃圾議員來抽水。」不過張就冇回覆連番批評,懶得理班網民!