政Whats噏：黃之鋒樣朱古力　網民話係時候食自己

香港眾志秘書長黃之鋒今日(11日)喺Facebook話要「食自己」，究竟係咩事呢？原來佢收到一份令佢頭痛嘅禮物，只見份禮物一式多份，印咗黃之鋒個樣上去，驟眼睇有啲似電話套，但佢話其實係朱古力嚟！黃似乎就唔係好想食自己個樣落肚，惟有上網徵集意見，睇吓點處理堆朱古力！

事緣係早排黃之鋒拎咗蘭托斯人權獎(Lantos Human Rights Prize)，原本應該要去美國領獎，不過佢官司纏身，護照被扣留離唔到境，最後叫咗黨友去代領，不過佢就勢估唔到仲附送幾十件朱古力，搞到佢都好疑惑，反問：「係咪美國文化來的？」

網民就建議佢派畀支持者，或者拎去年宵義賣，比較有創意嘅就叫黃之鋒「係時候『食自己』」、「睇吓你想派比邊個人『食』」、「食自己試吓係咩味先啦！」唔知黃之鋒睇完之後，會唔會真係試吓食呢？