政Whats噏：郭家麒批山頂纜車係香港之恥

山頂纜車能夠飽覽維港景色，可算係旅客訪港必到之處。不過，立法會議員郭家麒今日(12日)喺會議上就大彈山頂纜車，仲狠批為「香港之恥」，到底山頂纜車有咩咁不濟呢？

山頂纜車喺今年10月獲批第二個十年經營權，由2026年1月1日生效，同時又獲批額外使用3幅位於纜車軌道範圍旁嘅政府土地，以落實優化發展計劃。今日相關嘅附屬法例就交畀立法會省覽，郭家麒於是就大鬧一餐。

佢就話纜車乘客好似豬仔咁企喺度等上車，直言去到車站先發現係災難，因為唔知等幾耐，車錢又唔平，批評山頂纜車唔當乘客係人，如果善待乘客就唔會年年月月日日任由佢哋淋雨，明言乘客喺落雨同凍嘅天氣去等纜車係慘不忍睹，所以做幾多推銷都無用，完全是趕客，認為旅客返回老家實會叫人唔好再搭山頂纜車咁話。

郭家麒鬧完纜車又鬧政府，話政府完全唔理，批出專營權後又唔理，任其魚肉乘客，直言行徑倒米，質疑政府係咪要繼續睇住旅客同港人喺咁惡劣同極不人道環境下等車，大彈纜車係「香港之恥」，再加上早前講過香港公廁同樣惡劣，認為政府只係口講旅遊業，實質只係趕客。

商務及經濟發展局副局長陳百里發言時都提到聽到郭家麒嘅意見，話其實纜車公司已經做咗一啲排隊相關嘅安排，例如喺花園道對外增設排隊欄杆，嚟緊完成增建亦都可以承載多啲乘客、顯示等候時間等，仲話會繼續研究更多先進功能，所以希望透過增設法例盡快開展、盡快完成有關工程，而政府亦都會密切監察纜車公司嘅進度，咁就可以做番好啲山頂旅遊服務喇！