政Whats噏：何君堯自爆有好深嘅「事業線」？

一講起「事業線」，唔知你會諗起邊位女明星？立法會議員何君堯今日(13日)話自己都有「事業線」，條線仲要好深添！原來佢唔係講緊近年泛指女性乳溝嘅「事業線」，而係傳統睇掌所講嘅「事業線」，事關佢係60年代出世，當時無論喺屋企定喺學校都仲有體罰，唔單止成日食「藤條炆豬肉」，仲會畀校長、老師用間尺打手掌打到紅晒，何懷疑佢條「事業線」之所以咁深，可能都係打得多打番嚟！

做乜冇啦啦講起「事業線」？其實當時討論緊喺公營醫院內增設性暴力受害人及受虐兒童危機支援中心嘅議案，何就提出體罰同虐兒要明確區分，因為好多時小朋友未必會聽道理，所以頑皮嘅時候係父母就會施以適量體罰，而為免日後有小朋友畀父母打一兩下就報警話虐兒，所以指引一定要清清楚楚，盡量減少灰色地帶就最好喇！