政Whats噏：周浩鼎訪美　鍾意同的哥傾政見

立法會議員周浩鼎(Holden)近日應邀到美國華盛頓開會，向當地嘅議員及商界領袖「唱好香港」，佢尋日喺傳媒茶敍時講起，好鍾意同當地嘅的士司機吹水，講起美國總統特朗普，有個司機話「We are human beings. He is not. (我們是人類，他不是)」。

Holden話啲的士司機通常問完佢喺邊度嚟，就會講番美國嘅嘢，佢亦會問吓對方點睇特朗普，試過有司機同佢講「I don't even talk about this person. (我根本不會提起這人)」、「We are human beings. He is not. (我們是人類，他不是)」，啲司機又同佢講，美國人東岸就唔支持特朗普，而中部嗰啲就支持特朗普，有區域之分，同香港情況好唔同，香港政見唔同會「走唔甩」，同鄰居政見都會唔同，冇區域之分。

喺呢次行程，佢亦同美國國務院負責香港事務嘅官員見面，對方有關注取消議員資格(DQ)、禁止香港民族黨運作同馬凱事件，佢由青年新政游蕙禎、梁頌恆被DQ講起，逐一解釋點解會出現呢啲事，對方就話會繼續關注留意香港保護人權自由嘅情況，佢相信對方唔會照單全收，因為一次對話未必能完全改變人哋嘅諗法，但覺得應繼續溝通。