深水埗天降橫財：撒錢破壞公眾秩序　已觸犯《公安條例》

執業大律師陸偉雄指出，今次有人在深水埗天台撒錢落街，令到街上途人爭相執錢，引起公眾地方混亂，已經觸犯《公安條例》「意圖激使他人破壞社會安寧」，另不論事主撒錢的目的為何，即使出於善心要劫富濟貧，其行為最終令社會安寧受到破壞都屬犯法。另根據法律上的「夥同犯罪」，所有有份參與派錢的人都同屬犯法，包括策劃、出錢或落手撒錢的人。

另一方面，執錢的人有否犯法，則要視乎撒錢者的目的，他舉例指：「例如2014年的解款車跌錢事件，個物主無諗過有人會剝奪佢財產、會攞咗佢啲錢，係啲人自己執咗攞咗去，所以佢哋嘅行為犯法，拾遺不報。至於今次因為疑有人事先張揚派錢，唔要啲錢，歡迎人哋嚟攞，所以如果有人攞咗嗰啲錢，理論上無不誠實意圖，唔會犯法」。

惟陸呼籲，今次事件中執錢的市民，最好將錢交予警方，他解釋：「雖然佢聲稱送錢，但實質上要睇佢當時係唔係出於真誠，例如如果精神有異嘅人當街派錢畀人，但警方最終發現佢根本無意願，咁就唔攞得，套用返今次事件，如果警方發現有人撒錢嗰刻係瘋狂決定，無意願嘅，咁拾遺不報嘅人就有可能犯法，相反如果有人係都話唔要啲錢，執錢嘅人就無罪，所以其實係有風險，執到錢要畀返警員，因為永遠唔知啲人會唔會『彈弓手』」因此奉勸市民便宜莫貪。

此外，若市民在執錢期間引起混亂釀成傷亡，包括發生交通意外或人踩人等，可以向撒錢等有關人士追討損失，但只可以循民事追討賠償。

根據香港法例第245章《公安條例》7B條「公眾地方內擾亂秩序行為」，任何人在為某事情而召開的公眾聚集中作出擾亂秩序行為，或煽惑他人作出此種行為，以阻止處理該事情，即屬犯罪，一經定罪，可處罰款5000港元及監禁12個月。另任何人在公眾地方作出喧嘩或擾亂秩序的行為，或使用恐嚇性、辱罵性或侮辱性的言詞，或派發或展示任何載有此等言詞的文稿，意圖激使他人破壞社會安寧，或其上述行為相當可能會導致社會安寧破壞，即屬犯罪，一經定罪，可處罰款5000港元及監禁12個月。