政Whats噏：田二少唔掂　守龍門守輸畀小學生

平時從來都唔踢波嘅立法會議員田北辰(田二少)，今日(15日)竟然着起波衫、綁好波鞋，態度認真咁落場守龍門，究竟搞邊科？只見佢同3名退役曼聯球星組成一隊，對住100個香港小學生，並唔係正規比賽。不過，對手雖然係小學生，但腳法一啲都唔失禮，成功兩次攻破田二少嘅十指關，結果小學生隊贏2比1，真係曼聯球星都救唔到佢喇！

田二少話佢原本喺今次比賽只係負責聯絡啲小學生，等多啲清貧學生有機會同大球星踢下波，點知後尾要落埋場，佢直言自己從來都冇踢波，龍門更加唔識守，不過佢都冇特別訓練過，只係買咗啲裝備，同埋了解過個秘訣係企前啲守，咁少準備難怪輸波啦！

查實田二少成日鬧港鐵監管不力，今次終於輪到佢「把關」，結果都係搞唔掂，但佢話畀人入波冇咩所謂，最重要係班小學生開心，同埋自己冇受傷咁話。