政Whats噏:港台千瘡百孔 多方要求帳委會徹查

20181215
東網電視
更多新聞短片
消息指外間對於要求帳委會調查港台嘅聲音較大,民意難違!(設計圖片)
上月底審計報告力數香港電台多宗罪,包括收視奇低、製作成本高、不斷「炒冷飯」重播節目等,所以立法會政府帳目委員會(帳委會)都有意調查港台,睇吓每年使逾十億港元公帑嘅「糊塗帳」實情係點。雖然帳委會內的建制派同泛民主派對調查港台仍意見分歧、甚至拉鋸角力,但據悉唔少議員、市民都希望帳委會徹查港台,照咁睇嚟目前情況對帳委會都帶來一定壓力,否則難以向市民納稅人交代。
現時帳委會內嘅建制派傾向調查港台筆糊塗帳,但泛民就比較關注警方嘅採購出咗咩問題,雖然帳委會原則上唔會設調查數量上限,可惜礙於人手同工作量,兩項調查只能活一項,所以雙方就此拉鋸角力,而今日(15日)召開嘅帳委會會議閉門聆訊就邀請咗相關部門出席解畫,等該會委員多啲資料以衡量最應該調查邊個議題,下次會議作最後決定。
現時帳委會共有7名委員,建制對泛民4比3,但在主席慣性唔投票情況下,就會演變成3比3嘅局面,所以要調查港台定係警方,確實係會爭持不下,呢個時候該會就會考慮埋其他因素,例如聆訊結果、政府意見等。不過,消息指外間對於要求帳委會調查港台嘅聲音較大,民意難違,若泛民爭取查警方,都算係高難度挑戰。
到底係咪真係需要查港台?睇番審計署報告,港台唔單止收視低、成本高、不斷重播,仲有營運表現欠佳、外購單一化而被指有合謀風險、極多合約僱員、節目質素低等多個問題,可謂千瘡百孔,而港台作為公營機構,每年大大話話使緊逾十億港元公帑,衡工量值完全唔合格,係一筆不折不扣嘅「糊塗帳」,所以港台問題備受關注,絕對可以理解。
況且港台多年來被指「陰陽怪氣」、「煽風點火」、「低級趣味」,用納稅人錢唱衰政府,建制派及有關方面早就睇唔順眼,甚至有意見認為港台應該及早摺埋。審計署報告嘅批評都算係具公信力,相信泛民都唔敢話該署亂咁批評,如果港台真金不怕洪爐火,就唔怕帳委會查個水落石出,亦可以透過答辯向市民交代清楚。