政Whats噏：招攬白鴿黨舊人？楊岳橋暗示暫無意

過去有泛民區議員退出民主黨(白鴿黨)後加入公民黨(公文袋)，最近民主黨有近60人宣布退黨，被問到會否招攬佢地入黨，公民黨黨魁楊岳橋就表明，唔需要刻意有特別行動，認為民主路上有好多同路人，覺得大家喺地區有唔同程度合作係好自然既事，會鼓勵黨內嘅區議員繼續同各黨派合作。

公民黨今日(16日)選出新一屆執行委員會成員，由於沒有競爭，提名名單上嘅20人全數自動當選，其中主席梁家傑、楊岳橋、副主席陳淑莊同埋賴仁彪都繼續連任。而20人當中，出任青年公民主席嘅張鈞翹同埋執委王嘉盈，係新加入執委會嘅成員。

民主派喺上月嘅立法會九龍西補選中未能勝出，再加上公民黨現時喺九龍西冇議席，被問到部署方面，梁家傑就話黨內會有部署，喺民生議題上唔好畀人覺得太離地。至於明年區議會選舉，佢就話依家訂立選舉目標係言之過早，而依家有廿幾位地區發展主任，會按選拔機制派人參選，仲話有信心派出嚟嘅人選唔會畀人「堅離地」嘅感覺。

除咗議會工作同埋選舉之外，該黨最近成日都同外國交流，梁家傑就話香港係國際城市，唔少外國人喺香港投資同埋生活，所以未來兩年會繼續發展國際網絡，加強同國際社會嘅聯繫，正確反映「一國兩制」落實嘅情況喎。