政Whats噏：馮煒光唔知碇　邊境航拍被喝停

前特首辦新聞統籌專員馮煒光(Andrew)依家做回老本行財經公關，好耐無公開露面，原來最近忙緊四出玩航拍。Andrew今日(17日)與傳媒茶敍時仲自爆，試過喺中國同尼泊爾邊境玩航拍被武警叫停，嚇到佢要急刪片添！

Andrew將自己喺過去一年玩航拍影嘅相印製成座枱月曆送畀人，其中一張相係喺西藏珠穆朗瑪峰大本營影嘅絨布寺，十分驚險。佢憶述當日部航拍機一飛起，就有武警出嚟喝止，Andrew拿拿臨畀片對方睇，原來真係影到小小邊防設備，所以要即刻刪除，幸好對方同意唔使刪除絨布寺相片，形容「係劫後餘生證據」，就算個光差小小都要接受。

問到有冇試過跌咗部機？Andrew爽快話有，當日影影吓部機顯示唔夠電，但佢當時技術未到家，無法喺斷電前收番，部機跌咗喺新疆阿勒泰嘅湖邊，驚到要打畀航拍公司問點算，之後畀錢人執番。另一次喺香港，都係掛住玩冇留意，飛咗去人哋屋企撞到樹掛喺度，夜麻麻畀錢拯救隊去救機。