政Whats噏：議員拉隊逛工展　柯仔試食先提問

好多人都會對食物敏感，立法會議員柯創盛(柯仔)今日(18日)去到工展會試飲湯時，即刻問啲湯有冇落牛肉一起煲，原來佢一食牛就會嘔！柯仔話，之前同太太打邊爐叫一人一鍋，太太食牛，佢食豚肉，佢嗰鍋可能唔小心沾到少少牛肉湯，搞到佢未返到屋企，已經喺商場嘔。嘩，小心呀！

問起今次帶咗幾多錢買嘢，柯仔就話2000幾蚊，問起另一名議員鄭泳舜(Vincent)帶咗幾多錢，佢才急急睇吓自己有冇帶錢出街，好彩都有帶1000蚊喺身，Vincent之後可能試飲湯飲得太多，飲飲吓仲咳添！

議員蔣麗芸都有去掃貨，仲相當畀面，買咗勁多嘢，佢特別介紹買咗好多嘅麵包粉，話自己用焗爐整麵包好味啲、健康啲，又少啲添加劑，最緊要係買得多會送購物車，方便買其他嘢，認真精打細算！