政Whats噏:象哥開會戴黑超 瞌眼瞓創新招?

20181218
東網電視
更多新聞短片
黃定光(左)戴上一副黑超開會。(李志湧攝)
立法會進出口界議員黃定光(象哥)經常喺會議期間「閉目養神」,今日(18日)佢出席委員會時,喺室內都照樣戴住一副黑超,完全睇唔到佢雙眼,唔通係佢瞌眼瞓嘅新招?
其實象哥並非瞌眼瞓,而係佢雙眼啱啱接受完檢查。象哥回覆《東網》時話,佢年紀大有糖尿病,擔心併發症會影響視力,所以定期都會接受眼底神經檢查,檢查方式就係滴放大瞳孔藥水,所以佢笑言依家睇嘢感覺「一天都光晒」,眼睛對光線敏感,故去邊都要戴住副黑超。
象哥又自爆唔聽醫生指示,本來應每年檢查隻眼,但佢就懶到每兩年才檢查一次。象哥喺會上發言時亦先就戴黑超行為解釋,又話並非唔係對會議或者主席不敬喎。