政Whats噏：政府搞創科比賽　邵家輝叫獎金加碼

政府近年多次口講強調發展創新科技，但目前仲未見到有咩成績，今年施政報告提出撥5億港元喺未來5年舉辦「城市創科大挑戰」，即係官員諗唔掂，惟有求助民間啦。立法會批發及零售界議員邵家輝(Peter)就叫政府「現實啲」，話搞比賽最重要係一個「錢」字，叫政府喺獎金加碼，咁先能夠「重賞之下必有勇夫」喎。

呢個比賽係鼓勵市民提出創科解決方案，獲選方案可獲獎金，有任何人或團體可參與嘅公開組，亦設有學生組。Peter就話，錢係最實際，建議當局喺獎金環節加碼，令學生明白創科唔只講興趣，仲可以養到家，甚至致富添。

工程界議員盧偉國指，真正有價值嘅諗法，唔會輕易喺呢啲比賽拎出嚟，因為好大機會被人偷橋抄襲。另其他議員都話與其搞比賽，不如政府帶頭採用本地創科產品仲好啦。

對於Peter嘅獎金加碼建議，創新科技署署長蔡淑嫻話，香港科技園公司已獲政府撥款100億港元，相信有足夠資源配合呢啲新服務喎，即係轉身將個波拋畀科技園啦。