政Whats噏：劉怡翔漏口風　派$4000又推遲？

政府喺今年初公布關愛共享計劃，選擇性派錢4000港元方案，市民等到頸都長仲未攞到錢。財經事務及庫務局局長劉怡翔喺10月時，就話市民最快可以喺明年4月攞到錢喇，但佢今午(18日)出席財經事務委員會時，疑似漏口風，話出年2月申請「仲要3個月處理申請」，唔通又推遲到明年5月先有錢攞？

劉怡翔喺10月出席立法會接受議員質詢時，就話市民最早可於明年2月提出申請，預料明年4月有第一批申請人可領取關愛共享金額，但處理全數申請的時間需視乎個案複雜性。當時被議員炮轟計劃複雜，係浪費人力物力。

今日佢出席會議講收緊差餉寬減時，話要用錢整個新系統，畀議員鬧爆嘥錢，唔符合衡工量值。佢就話，好多時唔同議員有唔同意見，當局又想照顧大家意見，好似關愛共享計劃咁，微調到個系統好複雜，所以市民明年2月1日申請之後，又要3個月處理，慨嘆都係想搞啲簡單系統啫。