政Whats噏:唔夠20分鐘完會 議員提早收工過聖誕

20181219
東網電視
更多新聞短片
原定2個鐘頭嘅會議最後用咗唔夠20分鐘就完咗。(鄧學修攝)
雖然聖誕節未到,但唔少人個心都已經放緊假,立法會多個委員會今日(19日)舉行2018年最後一次會議,其中一個就係《2018年選舉法例(雜項修訂)條例草案》委員會,不過唔知係咪條條例已經傾得七七八八,所以班議員都諗住不如早啲搞掂收工,結果原定2個鐘頭嘅會議最後用咗唔夠20分鐘就完咗!
其實會議開始前都隱約可見議員對呢個會議興趣不大,事關喺上午11點正開始時,會議室內只有委員會主席張國鈞(Horace)一個,而按照規定,係需要「5+1」,即係需要5個委員再加埋主席先夠法定人數開會,眼見Horace係咁篤手機,好可能係叫緊啲其他議員落嚟開會,最終去到11點06分先夠人,但唔少議員又即刻走人,好明顯就係臨時落嚟湊人數啦!
條條例審議其實已進入尾聲,政府介紹完一啲技巧性修正案後,都冇議員跟進發言,所以11點17、18分鐘左右已經完會,前後唔夠20分鐘。議員麥美娟(Alice)喺11點20分左右諗住嚟開會時,立法會同事同佢講已完會,佢當時都唔係好信,仲反問:「係完咗定流咗?」不過佢話都係想點返個名,記錄佢有出席,所以就算Alice早啲落到嚟,相信個會都係極速完成,無礙議員齊齊早收工!