政Whats噏：電騙限制出境　黃之鋒哭笑不得

騙徒假冒執法人員係常見嘅電騙手法，過往有唔少人中招蒙受金錢損失，今次輪到香港眾志秘書長黃之鋒收到聲稱是執法部門的來電，令黃哭笑不得，因為佢嘅護照早已被「扣起」，反嘲騙徒呃錯人喇。

黃之鋒今日(19日)喺社交網站分享，指晨早流流收到自稱入境處嘅電話錄音，指佢已經被限制出境，然後再將佢接駁到操普通話嘅男士，對方再要求佢提供中文全名。

不過，黃之鋒就話早喺上年11月因涉及訴訟不准離境，佢本護照早已交由法庭保管，官司預料到明年4、5月才完結，期間都唔可以離開香港，所以騙徒明顯搵錯人呃咁話。

佢又將打入嚟嘅電話號碼公開，呼籲大家提防電騙，尤其要提醒屋企長輩，因為整段電話錄音幾可亂真喎。不過，有網民就話該電話號碼被冒充嚟呃人，可能屬於無辜市民，反叫黃唔好公開。