政Whats噏：羅致光變羅居士　曾夥蔡伯勵睇風水

勞工及福利局局長羅致光出名IQ高，寫馬經、渡海泳樣樣皆能，估唔到佢連風水都識睇，仲話十幾年前曾經同今年啱啱過身嘅堪輿大師、編纂「通勝」嘅蔡伯勵一齊去睇樓。究竟係咩風水寶地可以吸引到兩位高人呢？咪就係「窮絕全港」嘅觀塘區囉！佢話2006年同蔡伯勵一齊喺觀塘一個商場嘅頂樓俯瞰觀塘區，睇吓點樣重建啲風水先係最好喎。

羅致光雖然冇交代點解會同蔡伯勵一齊睇風水，但係即場化身「羅居士」，同記者講吓風水經，例如以前嘅家居布局點樣配合五行相生相剋，講到頭頭是道，唔識佢真係以為佢喺廟街擺過檔添。