政Whats噏：陳恒鑌邵家輝推莊　陳沛然自動當選

過往建制同泛民都經常爭奪做委員會主席位置，以掌握主導權，不過今日(21日)嘅《〈私營醫療機構條例〉(為施行第135(1)(a)條指明日期)公告》及《〈私營醫療機構條例〉(為施行第136(1)(a)條指明日期)公告》小組委員會竟然有推莊嘅場面，最終由醫學界陳沛然自動當選喇。

呢個只有4名成員嘅小組委員會今日舉行第一次會議，一開始就要選主席，而選主席嘅過程就由議員排名順序最前嘅議員陳恒鑌做主持喇。

議員郭家麒一開波就提名陳沛然，點知卻無人和議，批發及零售界邵家輝緊接其後提名陳恒鑌，但陳恒鑌直接請佢食檸檬，講明「我唔做」，搞到邵家輝要問可唔可以提名自己囉。

不過，當陳恒鑌話可以提名自己時，邵家輝又反口連叫四聲「唔好」，之後再重複四次「陳沛然喇」，成功令本身無乜人氣嘅會議廳傳出陣陣笑聲，而陳沛然亦都係無對手下自動當選喇。