政Whats噏:做立會主席?謝偉俊話係死亡之吻

2018年12月23日 14:58
東網電視
更多新聞短片
謝偉俊形容做立法會主席係「死亡之吻」喎。(設計圖片)

早排立法會議事規則委員會就議員因行為極不檢點,而遭立法會主席驅趕離場後嘅新罰則進行研究同埋諮詢,同時立法會主席梁君彥嘅處事手法經常都備受批評,有人甚至建議應該由議規會主席謝偉俊(Paul)做立法會主席一職添。不過咁大頂高帽笠落嚟,阿Paul似乎都嚇親,仲形容「呢個係死亡之吻」喎。

今日(23日)阿Paul出席一個電視論壇,同場仲有民主黨立法會議員尹兆堅(肥尹)。上年立法會修改咗《議事規則》,阿Paul就話喺拉布同拖延議會進度方面已經有改善,但係肢體衝突方面就冇,認為修改《議事規則》可以將立法會帶番去國際水準,同埋得體啲。

肥尹唔止認同阿Paul嘅說法,仲形容議會係「畸形」,因為議會結構同埋主席都唔夠得體、能力低。早排梁君彥喺特首答問環節上,驅逐幾位民主派議員出會議廳,之後仲腰斬埋答問環節,肥尹就話,有建制派議員都認為做法係不必要。

肥尹仲話,今屆議會成日出現小規模鬧交,係因為梁君彥好多時都錯判,導致議員提出規程問題,但對方視而不見,當議員繼續追問時,就會畀梁界定為叫囂,仲作出警告,佢形容呢種做法係夾硬嚟。

鬧完梁君彥之後,肥尹就提到有民主派建議應該由阿Paul做立法會主席,佢聽完都即刻叫好,仲話過去喺阿Paul做委員會主席期間,佢哋都未抗議過,仲成日讚佢做得好添!

聽到民主派嘅讚美,阿Paul好似受寵若驚,多謝對方之餘,仲好謙虛咁話唔敢當。被問到如果由佢做主席,喺立法會會點處事時,佢就話深信健康嘅民主制度係協調式政治,大家都講道理,動口不動手,但現實要執行就有困難。佢仲話,議會應該要有規矩,但依家情況係有規矩冇人守,所以去到某個極端情況就要做嘢,令公眾明白規矩係有人執行。

講番轉頭,其實阿Paul喺上年立法會修改《議事規則》期間,都畀民主派鬧過,只係冇梁君彥嘅情況咁嚴重。依家民主派都支持佢做立法會主席,唔知佢會唔會「口裏說不,身體卻很誠實」呢?