政Whats噏：田北辰改編聖誕歌　歌詞唔啱音

聖誕節嘅街頭到處都聽到聖誕歌，節日氣氛濃厚，連立法會議員田北辰都唱埋一份。不過，佢就創新地唱《聖誕辰曲2018》，將成首聖誕歌《Jingle Bells》重新填詞，大話要「抽乾太平洋」，但就唔係幾啱音囉！

田北辰一開波就唱住歌咁自我介紹，又名田二少嘅佢仲話自己係「田家Second Son(次子)」添。而經營時裝生意嘅佢又模特兒上身，試穿西裝褸、煲呔等，將「Jingle Bells，Jingle Bells，Jingle all the way！」改歌詞做「西裝褸，加煲呔，頸巾圍自己」囉。

硬銷完自己後，田北辰都不忙宣傳地區工作，話新界西嘅區議員用心跟個案，又叫大家環保啲，包禮物時要用報紙，「地球墮姐餌」，即係地球多謝你咁呀。結果，佢唱唱吓都質疑歌詞唔啱音而問係咪要改，但助手就話潮流興唔啱音，照唱就得，實行出奇制勝。