網民熱話：田灣速遞文件沙頭角　$175限時35分鐘？

雖然速遞工作講求速度，不過亦必須是合理時間。近日網上流傳一張Call車App的「柯打單」照片，有人要求將一份文件由香港仔田灣送至沙頭角，不過必須在35分鐘內完成，費用175港元。不少人直斥要求無理，笑言要搵直升機至幫到手。

根據單內顯示，接單者要將一份文件由田灣仁勝大廈送往沙頭角，當中更標明：「35分鐘內一定要到，否則必定賠償和投訴，一定要電單車，步兵咪接」。至於175港元費用中，145港元是路費，其餘30港元則屬「特別日子附加費」。

不少網民直斥要求無理，有人更即時透過網上地圖，發現該路段長達50公里，按正常車速亦要花近一小時。「35分鐘當人哋揸飛機咩」、「叫佢自己送啦」。亦有人笑稱「係咪牛頭角寫錯咗沙頭角呀？」甚至建議對方「Call直升機啦！」