政Whats噏:沈祖堯接林超英做環運會主席

2018年12月28日 12:03
東網電視
更多新聞短片
沈祖堯明年1月1日起接替林超英做環境運動委員會主席。

香港中文大學前校長沈祖堯自從冇做校長之後,就去咗威爾斯親王醫院睇症。而尋日政府就刊憲,委任沈祖堯做環境運動委員會主席,任期喺明年1月1日開始,喺2020年12月31日完結。至於現任環運會主席、天文台前台長林超英就將會喺任期屆滿後離任。

林超英由2013年開始就出任主席一職,加埋連任咗2次,一共做咗6年主席。政府公職一般有「六、六指引」,即係做6年任期同埋6個委員會,今次林超英做咗6年主席,所以佢自己都話唔再做喇,不過佢就話,環保嘅工作永遠都做唔完,希望新任主席沈祖堯可以繼續推動喎。佢解釋,話沈以前做校長,做慣教育方面嘅工作,希望對方可以諗多啲橋,將知識化為行動。

唔止沈祖堯,政府亦公布新一屆環運會成員,其中許湧鐘連任副主席,17名委員當中,有10人為新任委員,當中包括牙醫陳建強、中電企業發展總裁莊偉茵、同埋東區區議員李進秋等等。而沈祖堯亦被委任為做環境及自然保育基金委員會委員,任期同樣都係喺明年開始,為期2年。