政Whats噏：「順」成年度漢字　政黨指政府應順民情

由政黨民建聯舉辦嘅第六屆香港年度漢字評選今日(28日)公布結果，今年「順」字以5838票成為年度漢字第一名。該黨話，去年嘅「貴」字和前年嘅「亂」字都係市民眼中嘅社會現實，而「順」字唔單止係反映現實，亦表示咗市民希望社會變得順暢，強調「順」字有治理嘅意思，若管治者不順民情，將不能治理社會。

第二同第三名係「民」同「樓」，分別有2998票同1821票，查實呢兩個字喺舊年都好多人投，今年再度上榜並唔意外，不過今年名次就對調咗。油尖旺區議會主席葉傲冬話，「民」係指民生、以民為本，而今時今日嘅民生問題就係「樓」，感慨香港地少人多，話政府要竭力解決房屋問題先得喇。

其他候選漢字仲包括「公、風、通、守、地、禁、判」，觀塘區議員顏汶羽話「風」、「通」、「地」三字喺投票初段一直領先，因為呢啲字都同市民相當貼身，例如颱風山竹、土地供應問題等，後尾輸返轉頭，真係出人意表咁話。