政Whats噏:政界率先換新身份證 容海恩淡妝上陣

2018年12月28日 14:20
東網電視
更多新聞短片
容海恩到旺角換證中心辦換證。(溫國佳攝)

新身份證換領工作喺尋日(27日)開始,政府主要官員、行會成員、立法會議員等成為首批換證人士,立法會議員容海恩同黃碧雲今日(28日)就到旺角換證中心辦理換證,其中容海恩就選擇淡妝去影相喇。

容海恩為換身份證,準備十足,帶咗把梳去整理頭髮,亦預備有領嘅深色西裝褸,佢仲分享心得,提醒女士要帶備面油紙。而佢淡妝上陣影證件相,就解釋話妝容會出賣女性年齡,亦會反映出時代喎。

容海恩仲話,依家大緊肚影相換新身份證會特別有紀念價值,而自己無因懷孕而面部浮腫,睇嚟佢對今次影相好有信心。佢講番現時用緊嘅身份證時,就笑指自己張相似李小龍,仲話「男仔頭溝死女」!

至於黃碧雲就特登洗頭同吹頭先去影相,佢就覺得新身份證相片會比較好睇,因為自己唔使帶眼鏡無反光問題,而之前換證時頭髮太短似箭豬囉!而佢換證時都留意每個程序,佢就特別關心觸控螢幕嘅衞生程度。