政Whats噏：莫乃光梁繼昌冇手尾　卿姐點名鬧爆

前立法會議員劉慧卿(卿姐)離開議會已經有兩年多，不過今日(29日)就點名鬧兩位前戰友議員莫乃光同梁繼昌，究竟有咩過咗咁耐都仲要鬧呢？

自稱「環保班長」嘅卿姐今日出席一個環保活動嘅時候大翻舊帳，話當年喺立法會成日逐間房去巡，唔少人都好冇手尾唔熄燈、冷氣同電視等。不過在場就有市民唔信卿姐嗰時有咁做，同場嘅林卓廷就做人證，話莫乃光曾經講，依家換咗林做議員，萬一唔記得熄燈都唔會畀人鬧得咁緊要，因為以往會畀卿姐鬧喎！

卿姐之後就點名話莫乃光，連梁繼昌都拖埋落水，大鬧佢哋兩個成日唔熄枱燈，開會時盞燈開咗就走咗去，而佢喺會議廳內唔方便走去佢哋個位熄燈，惟有叫管事出手囉。佢大嘆咁小嘅事，花咗4年都培養唔出熄燈習慣，大嘆啲人習慣好差囉。

跟住卿姐仲話，睇唔到有人勝任「環保班長」接班人，就連林卓廷都做唔到，更話而家立法會好多房無人用都燈火通明，真係好慘咁喎！