政Whats噏：遊杜拜玩跳傘　葛珮帆嗌超爽

今個聖誕新年好多名人去咗杜拜玩，包括立法會議員葛珮帆(EQ)。佢話今次三代同堂把臂同遊，團員由4歲到75歲，玩盡水、陸、空。佢更抽咗一個朝早完成人生首次跳傘壯舉，感覺超爽超正喎！

EQ話，首次跳傘覺得既興奮又緊張。當喺13,000呎高空跳出飛機嘅一剎那，確實有啲驚，急墮約60秒非常刺激，塊面被風吹到變晒形。之後降落傘張開，有約5分鐘時間喺空中飛翔漫遊，飽覽杜拜靚景，就好享受喇！

佢仲話，之前喺新西蘭嘅大橋玩過笨豬跳，亦曾喺澳洲悉尼跳過最高嘅電視塔，真係估唔到佢鍾意玩咁刺激兼失重感覺嘅嘢。咁點解到依家先至玩跳傘呢？原來佢都試過預約跳傘，但因天氣太差而取消，今次終於成功咗。