政Whats噏：張國鈞葉傲冬扮拗手瓜　表情十足

立法會議員張國鈞近年熱愛健身，成功鍛煉出標準身形，更刺激到黨友油尖旺區議會主席葉傲冬倣效加入健身行列。葉傲冬今日(31日)就上載一張與張國鈞拗手瓜嘅相片，唔通兩人比較健身成果？咁到底鹿死誰手呢？

葉傲冬喺Facebook上載拗手瓜相，相中未見有人取得優勢，不過張國鈞就面帶微笑，一臉輕鬆，似乎信心十足，相反葉傲冬就相當肉緊，連眉頭都皺晒，露出痛苦嘅表情，睇嚟賽果唔難預料。不過，其實兩人並非真正比試，張國鈞笑笑口話，實情係兩人難得喺健身室相遇而拍照留念，但又嫌企定定影相太生硬，所以就搞搞新意思啫！

另外，葉傲冬話假期喪食後要還，但張國鈞就自言冇呢個煩惱，事關假期同屋企人去日本，飲食要遷就小朋友口味，餐餐都食天婦羅烏冬，而且期間仲要趕博士功課，所以自己冇啖好食囉！