政Whats噏：元旦遊行前夕　政總旗杆密封花槽完工

民間人權陣線(民陣)將於明日(1月1日)舉辦元旦遊行，炮轟律政司唔會就前特首梁振英任內涉收取澳洲企業UGL五千萬港元事件進行檢控，以及「明日大嶼」填海計劃等事件，遊行終點係政府總部東翼前地。遊行前夕，政總東翼前地嘅固定花槽已完工，唔通係怕元旦遊行會再有人佔領嗰個位置？

東網記者今(31日)發現，政總東翼前地固定花槽工程已經拆去原有圍上的白板，地面仍有泥沙及少許掉落嘅葉，有關人員運走數十盆多出嘅盆栽，又整理花槽附近嘅地磚及清洗。

政府總部東翼前地過去曾發生過佔領事件，其後加建永久圍欄，喺違法佔領行動後更一度關閉至去年底。今年6月，政總東翼前地內嘅旗杆平台擺滿盆裁，當時已被質疑係為咗慎防再有遊行人士佔領，10月時該處圍上白板，行政署聲稱有關工程會以固定花槽代替花盆，增加土壤等，為咗令綠化效果更佳。