政Whats噏：招文亮自爆年齡　顏汶羽感意外

觀塘區議員顏汶羽同沙田區議員招文亮今日(2日)出席傳媒聚會，期間招文亮自動報上歲數，自揭已經36歲，即將身份有變，而顏汶羽對佢咁誠實都感意外，明言無諗過招會咁早公布，到底講緊咩呢？

顏汶羽同招文亮分別係青年民建聯嘅正副主席，任期將於今年3月底屆滿，而組織有規定35歲或以下先能夠加入，所以將會有人夠鐘離開，而招文亮就搶閘公布將會卸任，因為已經超過年齡限制，仲笑話咁辛苦走唔切喎！

招文亮就形容，退落嚟似生老病死嘅必經過程，而自己曾經參選，年齡已經唔係秘密，難怪唔怕自爆。佢更話卸任並唔代表日後會多咗時間，因仲要繼續地區工作等，可能更辛苦都未定。

至於顏汶羽仍符合年齡條件，但主席由委任產生，自己只能尋求獲委任，而現時班子喺過去兩屆都無大變化，合作無間，但換屆後會有4名領導層離開，所以將有唔少新面孔，佢亦預料競爭會激烈喇。