政Whats噏：遊荷蘭遇劫　葉劉騷腿展示傷勢

立法會議員葉劉淑儀早排與女兒去歐洲旅行，去到荷蘭最後一站時，就遇上電單車黨搶手袋，雖然佢力保不失，但就受咗傷。葉劉今日(4日)返去立法會開會，就有多名議員上前慰問，佢更再一次露腿，展示膝蓋嘅傷勢。

仲記得葉劉曾經喺電台節目時放隻腳上枱，而以往喺社交網站佢都好樂意晒腳。今日佢被問到傷勢時，都好大方咁摺起褲腳，展示膝頭上嘅痂，又除低大褸畀大家睇吓手㬹嘅瘀傷，見到過咗幾日仍未完全去瘀。

葉劉就話，旅程喺倫敦、摩洛哥等地嘅人多城市就有警覺性，提防扒手，不過去到荷蘭就稍為鬆懈，加上當時係除夕，唔少店舖提早閂門，街道人流疏落，但事發之後都有唔少當地人上前問候佢。而佢返港後就未有求醫，只係自己捽咗好耐藥油，依家已經無咁瘀，更大嘆好彩自己當時身穿兩件冷衫同一件大褸喇。