政Whats噏︰日日聽冤情　常霖法師教立會職員開心啲

立法會不時都會為秘書處職員同議員助理（議助）等開辦工作坊，而本月29日就有一個工作坊教秘書處公共申訴辦事處職員同議助，點樣以正向思維處理申訴及困難境況，仲特登請咗一位法師到立法會講解，兼教參加者進行呼吸練習。呢位法師相信大家都聽過或認識，就係2010年剃度出家的前著名攝影師葉青霖！立法會主席梁君彥主持大會時，都經常面對議員各種「申訴」要求，皮質醇都好容易飆升，如果佢參加工作坊，可能都會有好處。

立法會秘書處邀請嘅常霖法師，經常都會舉辦講座及帶領禪修活動。今次法師就會教立法會職員同議助點樣以正向思維處理申訴個案，以及在遭遇人生困境時，點樣以正向思維坦然面對。法師仲會帶領參加者進行「停一停，『心』呼吸」練習，等參加者學習喺處理申訴個案時，如果遇到壓力同困難可以點樣放鬆。

秘書處回覆話，該處一直有為負責處理投訴的申訴處職員舉辦工作坊，由於議助亦會參與處理市民申訴，所以亦邀請議助參加。秘書處知悉常霖法師有豐富演講經驗，並曾協助不同機構舉辦工作坊，故向常霖法師提出邀請，仲獲法師答允免費演講添。秘書長陳維安就話，因為申訴處職員每日都收到好多市民申訴個案，聽埋聽埋好多「冤情」，擔心職員會吸收負能量，所以透過工作坊希望佢哋學識調節心理，及處理申訴個案時開解申訴人，確係一舉兩得。

其實立法會內，會遇到壓力同困難嘅又點止負責處理市民申訴個案嘅職員同議助吖。主席梁君彥主持會議時都經常面對民主派反對、提出規程問題等，佢仲試過會議出現爭議同混亂期間，叫坐喺座位嘅議員「坐低」；又曾經有民主派議員被他逐離會議廳時大叫「你食屎啦梁君彥」，壓力可想而知。而財務委員會主席陳健波亦曾自爆，主持財委會要啪雙倍降血壓藥，真係令人擔心佢嘅身體健康。兩位主席都經常面對壓力，聽吓法師指點可能都會獲益良多。