政Whats噏：狙擊領展食檸檬　 葉劉變身噴火龍

立法會議員葉劉淑儀同領展牙齒印深，過去一直都有狙擊領展，包括巡視被領展賣咗嘅商場情況，再拍片記錄。今日(7日)葉劉出席立法會財經事務委員會時，又想把握機會講領展，不過官員一開波就落閘，搞到葉劉嬲爆爆，拍枱大鬧官員「係咪當我哋傻㗎？」連委員會主席張華峰出面做和事佬，都冇面畀添！

葉劉曾經喺前年自爆，因為經常喺立法會同專欄批評領展，領展就透過公共政策顧問李兆富恐嚇時任該黨政策總裁袁彌昌，話唔收手就會郁佢嘅區議員，結果換來葉劉被控誹謗，更被要求索償，好彩最後能夠和解。而民主派過去曾提交呈請書，要求成立專責委員會調查領展拆售問題，作為建制派嘅葉劉都罕有地支持，所以話葉劉同領展嘅恩怨真係一匹布咁長。

今日會議討論《房地產投資信託基金守則》嘅實施情況，由財經事務及庫務局首席助理秘書長（財經事務）鄭嘉慧負責作出匯報，佢匯報到結尾時，講明唔會公開評論個別個案。接住發問嘅葉劉一開口就發炮，點名話對文件同埋官員發言非常失望，仲可能太過嬲而叫錯鄭嘉慧做蔡嘉慧。葉劉表明不滿官員一開始就落閘，防禦性咁唔畀問個別公司，即係唔准議員問領展喎。

葉劉愈講愈火滾，狠批政府文件中所交代嘅數字扭曲，因為人人都知過去市值升得多嘅房託基金其實只有一間，就係領展，不滿文件並無細分數字，反問政府「當我哋傻㗎，一開頭就落閘」，直指官員保護大財團之心昭然若揭，完全唔顧小市民痛苦。葉劉句句到肉，之後更激到拍枱，再問多句「係咪當我哋傻嘅先？」

張華峰見狀都幫手打圓場，着秘書長多啲同葉劉傾，又建議發言時間已夠嘅葉劉作第二輪發言，轉頭再追問。不過葉劉就唔領情，話自己要同政府開會，要走喇，隨即企起身執嘢，但係都忍唔住鬧多句，話在場官員「咁嘅態度，開會都無用喇」，非常扯火。

議員區諾軒一樣唔收貨，認為10間房託基金喺市場上分布差別大，零零舍舍得領展市值去到1700億元，政府無理由話唔提得個別基金，批評呢種做法虛偽，為咗掩飾放寬《房地產投資信託基金守則》，令到領展繼續賺大錢嘅客觀事實囉。