政Whats噏︰採訪安排要改善 朱曼鈴捱轟

2019年01月08日 12:53
東網電視
更多新聞短片
政府新聞處處長朱曼鈴負責整體統籌安排傳媒採訪。

傳媒一直秉持第四權監督政府施政,但近年喺採訪工作上「綁手綑腳」,尤其係喺政府重大政策出台時,政策局選擇以「扑咪」取代正式記者會,令採訪工作「呢咁hea」。行政會議今日(8日)開始前,政府竟「自動投案」提及早前土地供應專責小組公布土地大辯論報告,及參觀即將開通的中環灣仔繞道嘅採訪安排,均有改善空間,變相暗批負責有關政策嘅發展局、運輸及房屋局,及負責整體統籌安排傳媒採訪嘅政府新聞處安排不力。擺明係插政府新聞處處長朱曼鈴做得唔好喇!

特首林鄭月娥喺行會前慣例同傳媒見面及回應提問,但佢竟喺開場白發言主動提及,話留意到最近兩項傳媒安排採訪,即早前土地供應專責小組(土供組)公布報告安排及即將開通的中環灣仔繞道的採訪安排,引起外界「都有啲意見」。佢更承認以上兩件事情嘅安排有改善空間,要求各政策局喺安排與傳媒交代重要事項,參觀重大基建設施時應「更加主動及更加積極」,因為傳媒深入採訪對政府工作有幫助,佢亦表示尊重傳媒為公眾監督政府的功能。

咁又難怪嘅,回帶睇番之前新聞處的確做事太多「甩甩漏漏」,好似去年中上載特首喺行政會議前會見傳媒嘅講話全文,其中一次竟然將國家領導人嘅名寫錯。至年底時,特首辦又搞錯相片,拖累新聞處出錯相。喺短短半年時間一而再出事,已證明程序未夠謹慎。

至去年除夕當天,土地供應專責小組公布報告,記者要席地而坐記錄內容,已屆六旬嘅小組主席黃遠輝更企足一個鐘做回應。之但係負責土地政策嘅發展局局長黃偉綸,喺上屆政府做過新聞處處長,唔通升咗職就忘記咗要點樣安排?好似中環灣仔繞道咁,被揭發隧道大滲漏,然而首先係安排議員去睇,跟住搞步行籌款,市民亦睇到隧道有滲水嘅情況,但最後先安排傳媒採訪,呢種做法被質疑唔尊重傳媒監督社會嘅角色。

此外,沙中線紅磡站擴建工程剪鋼筋醜聞,當局正逐步展開鑿石屎檢查工作,卻每每到深夜時分先公布結果。今日一個記者會上,有記者質疑當局刻意咁做似唔想畀大家知咁,運輸及房屋局局長陳帆只係輕輕一句「唔好意思」帶過。

倘若政府做事真係無愧於市民,又當真尊重傳媒為公眾監督政府的功能,點會唔能夠做得好好睇睇,妥妥當當呢?與其開口責成下屬,倒不如反思如何領導團隊好過嘞!