政Whats噏:九東搞智慧城市 男議員求供流鶯熱點

2019年01月08日 17:04
東網電視
更多新聞短片
馬軼超十分關注區內流鶯熱點。(郭詠欣攝)

政府以九龍東作為推動智慧城市嘅試點,不斷喺區內加設智能設施及開發Apps配合。觀塘區議會今午(8日)討論項目推展情況時,多名議員質疑當局自2016年來所落實的措施成效不彰,惟有一名男議員卻關心區內流鶯熱點資訊,認為當局「必須」做到先夠智慧!嚇得一眾議員嘩聲四起。

議員馬軼超話,好歡迎政府推動公共數據,認為可有助年輕人創業,但依家智慧城市版圖只集中商貿區,未有處理大家所關心嘅社區問題。咁有咩社區問題要解決?佢話包括衞生同交通黑點,以及流鶯熱點,坦言政府必須做到先夠智慧喎。

在席多名議員都聽到目瞪口呆,不少人更竊竊私語。事後問番點解咁關心流鶯?馬軼超解釋,區內太多流鶯出沒,對居民造成滋擾,如果有數據顯示佢哋現身,警方就可以做佢應該做嘅事嘞。

另外,多名議員認為各部門協作不足,又批評只推動商貿區做智慧城市係「離晒地」。負責項目嘅起動九龍東專員區潔英就叫大家唔使擔心,皆因現屆政府力推創科,就算佢叫唔郁啲部門,政府高層都會搞掂。佢更解釋,由當初落實九東作智慧城市試點,已決定只做商貿區,唔係今日發生嘅事。