政Whats噏：告別鳳袍　Pink Lady利敏貞現身立會

商務及經濟發展局常任秘書長利敏貞去年以一身花花鳳袍出席記者會，惹來網民熱議，佢今日(9日)去立法會一個小組委員會時就冇着鳳袍，改以粉紅花花長大褸，配以白色花花長珠鏈現身，成個Pink Lady咁，一身春天氣色，唔通見天氣回暖加上農曆新年就到，想應下節？

利敏貞嘅花花鳳袍經典造型，就連商務及經濟發展局局長邱騰華都大讚佢有「Fashion Sense(時裝觸覺)」，佢之後出席酒會都試過着咗一條黑底紅綠花裙，今次就着粉紅花花長大褸，就連白色長珠鏈都有花花，似乎對花情有獨鍾。上身咁搶眼，下身自然就相對簡單啲，佢襯咗黑色長褲加黑色粗踭鞋，另外加黑色手袋。

講番今次會議係討論新增多個職位，以便香港喺外地開設多個經貿辦，利敏貞話，過去10年淨係開咗兩個經貿辦，都係針對東盟市場，喺中美貿易陰霾下，有需要帶企業出去拓展新市場，今次希望開多個經貿辦，帶企業出去，帶投資入嚟。