政Whats噏:楊岳橋甩轆議案撻Q 累街坊兼被狂寸

2019年01月09日 16:43
東網電視
更多新聞短片
楊岳橋甩轆無法提出動議,連累范國威無得發言。(設計圖片)

今日(9日)係踏入2019年嘅首個立法會大會,議員就提早收工嘞!咁筍?事關公民黨(公文袋)立法會議員楊岳橋(AY)不在席,所以無法提出議員議案,會議提早咗3個鐘左右完會。AY呢次甩轆唔單止累埋街坊,仲畀建制派狂寸呀!

根據《議事規則》,提出動議嘅議員需要喺立法會主席叫喚時起立動議,換言之如果議員不在席,就無法提出動議。而喺今日下午4點幾,以不記名投票方式通過勞工界潘兆平嘅「檢討假期政策」議案,正當大家準備討論AY嘅「檢討單程證政策」議案時,立法會主席梁君彥就宣布話由於AY不在席,所以無法提出動議,仲宣布埋休會添!

喺休會後嘅幾分鐘,AY現身會議廳外,正當佢同人稱建制派班長嘅商界議員廖長江一齊行入會議廳時,唔少建制派都隨即圍住佢,當中民建聯劉國勳就同佢講話自己準備咗發言,依家搞到佢冇得發言,仲做埋手勢話「你個議案冇咗喇」,而新民黨葉劉淑儀一見到佢,仲即刻指住佢話「撻Q呀你,去咗邊呀你」。

後來AY解畫,話當時佢就喺辦公室,睇緊政制及內地事務局有關《國歌條例草案》嘅記者會直播,所以冇準時落返嚟會議廳提出議案。佢強調事件係個人責任,仲因為自己嘅疏忽大意而向市民同埋準備咗發言嘅議員鞠躬道歉,又承諾會深刻檢討,日後唔會再犯同樣錯誤。佢仲話未來唔會停止關注單程證問題,嚟緊會爭取喺今年內就改革單程證制度方面提出私人草案。對於今次事件嘅教訓,AY就用咗「一心不能二用」嚟總結,話就算有兩個重大議案,都要諗清楚要做啲乜。

其實今次有4位議員就議案提咗修正案,其中新民主同盟范國威(Gary)一直好關注單程證問題,今日中午仲特登開個記者會提及自己嘅修正案,咁大鑼大鼓都係想引起市民嘅注意,同埋可以正式喺大會度講,點知畀AY一鑊蹺起,變咗粒聲都冇,簡直係累街坊喇!

Gary就話有啲失望,但日後會透過其他途徑跟進,包括提出議員議案,而佢嘅黨友譚凱邦就喺Facebook 貼文話:「立法會咁大鑊.......?準備咗咁多嘢講單程證,竟然......」。有網友直情話冇眼睇,另一名網友仲話成件事搞到咁好核突。擺明係條氣好唔順呀!