政Whats噏：答問大會官員議員閉目　唔通瞓咗？

立法會每逢答問會，好多問責官員都會出席，以示支持。不過，東網記者今日(10日)喺答問會舉行嗰陣發現，坐喺二樓聽會嘅發展局副局長廖振新同保安局政治助理劉富生閉目好一段時間，唔通瞓着咗？

每次答問會，雖然司局長都毋須發言，但絕大部分局長或部分副局長都會坐喺會議廳內，唔少副局長同政治助理就會坐喺二樓聽會。會議廳內咁多鏡頭，局長就自然警覺啲，而二樓比較暗，唔知係咪以為冇人發現，廖振新同劉富生就瞌咗眼，疑似瞓咗一陣。

議員亦不例外，身兼行政會議成員嘅立法會議員黃國健喺答問會講到收緊長者綜援時，亦皺眉閉目好耐，但一聽到被指有份批准呢個政策，佢就即刻張開眼，唔通嚇醒咗？

翻查資料，副局長月薪介乎21.7萬至25萬港元，政治助理月薪介乎8.4萬至11.7萬港元，「雙料」議員月薪就逾14萬港元，如果咁高人工都開會瞓着，就真係爭唔落啦！