政Whats噏：收緊綜援　徐英偉扮長者幾分鐘叫攰

勞工及福利局副局長徐英偉平日接觸嘅政策唔多唔少都關老人家事，佢今日(12日)喺香港傷健協會嘅「家+共融」親子遊樂節，更加着起特製套裝扮長者，駝背兼撐拐杖體驗吓老友記有幾辛苦。除咗扮老人家外，佢仲試埋坐電動輪椅，同埋「裝假狗」扮大肚婆。

大會安排佢着住一件特製背心，駝起背脊嚟行路，搞到佢要篤住拐杖，扶住欄杆慢慢行先上到斜路。佢仲戴埋「老花鏡」，感受吓老人家眼矇矇嘅感覺，要用放大鏡先睇到巴士站牌啲字。不過行咗唔夠5分鐘，年輕力壯嘅佢已經話：「好攰啦」，感受到老人家平日出街「一啲都唔容易。」當局就準備收緊長者綜援申請資格，叫60歲嘅老友記出返嚟做嘢，但佢自己行幾分鐘都叫攰，點服眾？