政Whats噏：田二少遲熟冇衝動　沒跟同學睇三級片

傳統名校拔萃男書院今日(12日)舉行150周年校慶啟動典禮，唔少身為男拔校友嘅政商界名人都有出席，包括立法會議員田北辰(田二少)同張宇人等。1967年畢業嘅田二少重返校園，憶起當年讀緊中四嘅時候，唔少比較曳嘅同學仔放學會拉隊去睇三級片，「你知男仔學校㗎啦，血氣方剛！」不過佢就話自己比較遲熟，「嗰陣未有咁嘅衝動」，所以冇跟埋一齊去。

田二少仲話，當年寄宿嘅同學通常最曳，而佢自己就冇住宿舍，屬於乖學生。男拔出名有個又大又靚嘅球場，不過田二少就話自己唔夠氣，「踢親波都包尾」，所以就揀打乒乓波。唔講唔知，田二少當年打乒乓波原來都幾犀利，中一至中五都係乒乓波校隊隊員。佢最記得中四嗰年對英華書院嘅學界比賽，佢負責打決勝局，「嗰時好大壓力，打到滿頭大汗」，結果靠不斷用「滴滴仔」穩穩陣陣咁打，最後都贏到對手。