政Whats噏:劉小麗送氣球花 小妹妹唔畀面

2019年01月13日 16:05
東網電視
更多新聞短片
劉小麗幾經努力扭出朵靚花,手勢都唔錯。(溫國佳攝)

一向社會都認為女仔必定鍾意收花,但其實都係要睇邊個送嘅。今日(13日)團體「社區前進」聯同一眾民主派議員喺太子開街站寫揮春,久未露面嘅前立法會議員劉小麗(小麗)用氣球整咗朵花,想送畀現場一位小妹妹時,點知對方拒絕,令小麗好尷尬咁苦笑。

唔少社區主任或議員都有十八般武藝,小麗就識得扭氣球,劍、花、小狗同桔仔等花款都難唔倒佢。佢話新年扭桔最受長者歡迎,有啲靚波可以放3星期都唔爆添,最可惜係豬年前都未學識扭豬仔喎。睇佢扭波都似模似樣,一啲都唔怕爆波,但似係太耐冇扭,第一朵花嘅花瓣唔太對稱,要拆掉重來。

幾經努力扭出第二朵花後,小麗興高采烈上前送花畀一位小妹妹,點知妹妹擰頭就走。無奈被拒絕嘅小麗,只好自己帶住朵花自娛一吓,笑稱妹妹傷咗佢心喎。